దొంగలు పడ్డారు

*
"నిన్న రాత్రి మీ ఇంట్లో దొంగలు పడ్డారటగా ? " అడిగింది పక్కింటి పంకజం .

"అవును , చీకట్లో చూసుకోకుండా కాలేసి, మేము పారేసిన అరటిపళ్ళ తొక్కల
మీద జారి దొంగలు పడ్డారు "

ఎటు వైపు ?

*
"మీరు నిద్రించేటప్పుడు ఎడమవైపు పడుకుంటారా ?, కుడివైపు పడుకుంటారా ?"

"రెండు వైపులా పడుకుంటాను ,నా శరీరం మొత్తం ఒకేసారి నిద్రిస్తుంది "

దేవుని దయ

*
"మీ హేతువాద సభలు ఎట్లా జరిగాయి ?" అడిగాడు ఆచారి, రామానంద్ ని .

"భగవంతుని దయవల్ల విఘ్నాలు లేకుండా చక్కగా జరిగాయి "

వేస్ట్ ఖర్చు

*
వరలక్ష్మి రాష్ట్రస్థాయి "ఉత్తమ పొదుపుమహిళ" గా ఎంపికయ్యింది

విలేఖరులు ఇంటర్వ్యూ చేస్తున్నారు . ఓ విలేఖరి ప్రశ్న ,

"మీరు ఇంతవరకు జీవితంలో దేనికైనా డబ్బులు బాగా వేస్ట్ చేసారా ? "

"ఒకేఒక విషయంలో . 5 లక్షలు పోసి మొగుడిని కట్టుకొన్నపుడు "

తాజ్ అందాలు

*
"ప్రియా ! నీలాకాశం క్రింద అందమైన ఈ సాయంత్రం, పాలరాతి తాజ్ మహల్
చూస్తుంటే నీకేమనిపిస్తోంది ? "

"ఇటుగా మా ఆయన రాకుంటే ఎంతో happy గా ఉంటుంది సందీప్ !"

దేవ"డోసు " తపస్సు

*
దేవదా(డో )సు ఘోరంగా తపస్సు చేసాడు .దేవుడు ప్రత్యక్షమై ,

"భక్తా ! ఏమి నీ కోరిక ? " అని అడిగాడు .

"మీతో కలసి మందు కొట్టాలని ఉంది ,అంతే " మత్తుగా చెప్పాడు దేవ డోసు .

దురద

*
పేషెంట్ : ఈ మందు వాడితే దురదలు తగ్గుతాయా డాక్టర్ ?

డాక్టర్ : లేదు ,గోళ్ళు పెరుగుతాయి .హాయిగా దురదున్న చోట గోక్కోవచ్చు .

ప్రేమ విషయం

*
"కిరణ్ ! మన ప్రేమ విషయం ఈ రోజు మా నాన్నకు చెప్పు"

"మీ నాన్న అసలే మిలటరీ ఆఫీసర్ .విషయం విని నన్ను తుపాకీతో
కాలుస్తాడేమోనని భయంగా ఉంది"

"భయమేం లేదు .మా నాన్న తుపాకీ రిపేర్ కిచ్చారు "

365 లేఖలు

*
గుడి మెట్లపై కూర్చొని శూన్యంలోకి చూస్తూ కొబ్బరి ముక్క తింటున్న
మారుతి ని భుజం తట్టి పలకరించాడు పాత మిత్రుడు ఆంజనేయులు .

" విజయవాడ అమ్మాయి వాణిని ప్రేమించావు కదా ,ఎక్కడ దాకా
వచ్చింది వ్యవహారం ? "

"నేను విడవకుండా ప్రతి రోజూ సంవత్సరమంతా 365 ప్రేమ లేఖలు
అందంగా రాసి పంపాను ఆమెకు "

" తరువాత ? "

" ఆమె పోస్ట్ మాన్ ను పెళ్లి చేసుకుంది "

అబద్దం -అద్దం

*
ఇద్దరు బ్లాగర్ల ఈటపాల రాతలు

మొదటి బ్లాగరు : " మీ బ్లాగు చాలా బాగుంది "

రెండవ బ్లాగరు : "నాకు మీ బ్లాగు బాగా నచ్చింది "

మొదటి బ్లాగరు : " మీరు నా లాగే అబద్దాలు చెబుతున్నారా ? "

కుటుంబ నియంత్రణ

*
"ప్రపంచం లో అత్యుత్తమమైన కుటుంబ నియంత్రణ పద్దతి నీకు చెప్పనా ? "

" వద్దు "

" అదే నేనూ చెప్పేది "

నాన్న జోకు

*
చిన్ని, చేతన్ స్కూల్ బస్ దిగి గేటు తీసుకొని ఇంట్లోకి
అడుగు పెడుతున్నారు .

చేతన్ : అక్కా ! అమ్మ అంత బిగ్గరగా నవ్వుతోందేంటి

చిన్ని : నాన్న జోకు వేసారు

చేతన్ : నాన్న జోకుకు అమ్మ నవ్వుతోందంటే ,
మనింటి కెవరో చుట్టాలు వచ్చినట్టున్నారు

చూసిన సినిమా

*
కిరణ్ : నా ప్రాణ స్నేహితుడు రాము , నాకు చెప్పకుండా ,
నా గర్ల్ ఫ్రెండ్ తో కలిసి సినిమా కు వెళ్ళాడు రా నిన్న .

కృష్ణ : మరి నువ్వేం చేసావు ?

కిరణ్ : ఏం చెయ్యను ?, నేను ఆ సినిమా మొన్నే చూసేసాను .

తప్పు కు కారణం

*
"స్వామీజీ ! రోజూ నేను నాలుగైదు గంటలు అద్దంలో నన్ను నేను
చూసుకొంటూ తప్పు చేస్తుంన్నాననిపిస్తోంది. బహుశా అందం వల్ల
వచ్చిన గర్వం దానికి కారణం కావొచ్చు కదా ? "

స్వామీజీ ఆమెను పరీక్షగా చూసి, చెప్పారు,

"తప్పు నీ ఊహ వల్ల, అందం వల్ల కాదు "

రష్యన్ భాష

*
"రవీ ! నీకు రష్యన్ భాష చదవటం వచ్చని కిరణ్ నాతో చెప్పాడు ,నిజమేనా ?"

" నిజమే , దానిని తెలుగులో రాసినపుడు "

ఇద్దరు సన్నాసులు

*
ఇద్దరు ముసలి సన్నాసులు తమ అనుభవాలను పంచుకొంటున్నారు .

"నేను జీవితం లో ఎవరి సలహాలు వినక ఇలా అయ్యాను "
బాధపడ్డాడు ఓ సన్నాసి .

"అందరి సలహాలు వినే నేనిట్టా అయ్యాను " నిజం చెప్పాడు మరో సన్నాసి .

చెల్లి ఏడుపు

*
"ఏరా చిన్న చెల్లిని ఎందుకు ఏడిపిస్తూన్నావు ? "

"దానికి నా చాక్లెట్ పెట్టలేదని ఏడుస్తోంది "

"మరి దాని చాక్లెట్ ఏమైంది ? "

"నేను అది తింటున్నపుడు కూడా ఏడ్చిందమ్మా చెల్లి"

ఖైదీ లొంగిపోయాడు

*
ఒక సీనియర్ ఖైదీ అతి కష్టం మీద జైలు నుండి తప్పించుకొని పారిపోయాడు .
కానీ ఆశ్చర్యం గా అదే రోజు సాయంత్రం తిరిగి లొంగిపోయాడు.
విలేఖరులు చుట్టూ మూగి కారణ మడిగారు

"బయటపడి మొదటగా నా భార్యను కలుద్దామని ,ఇంటి కెళ్ళి తలుపు తట్టాను .

విసురుగా తలుపు తీసిన వెంటనే ఆవిడ అడిగిన మొదటి ప్రశ్న :

"ఇప్పటి దాకా ఎక్కడ చచ్చావు ?, తప్పిచ్చుకొని 8 గంటలైతే " "

ఆదర్శ దంపతులు

*
"ఏమండీ ! మన పక్కింటి ఆలుమగలు ఎంత ఆదర్శ దంపతులో కదండీ "

"అలా అనుకోకు ,బహుశా మన గురించి కూడా వాళ్లు అలాగే అనుకుంటూ
ఉంటారు "

పొరపాటు- తప్పిదం

*
గుళ్ళోకి వెళ్ళినప్పుడు ,మన పాత చెప్పులు మరచిపోయి,
వేరే వాళ్ల కొత్త చెప్పులు వేసుకొని రావటం "పొరపాటు "

మన కొత్త చెప్పులు గుళ్ళో మరచి , పాత చెప్పులు
తొడుక్కొని రావటం " తప్పిదం "

షేర్లు పెరుగుతాయి

*
ఇన్వెస్టార్, షేర్ బ్రోకర్ మధ్య సంభాషణ :

ఇన్ : మార్కెట్ పీక్ లో ఉన్నపుడు "గోల్ మాల్ లిమిటెడ్ " షేర్లు
1023 రూపాయలకు 500 కొన్నానండీ. ఇప్పుడు అది 42 ఉంది ,
కొంటే పెరుగుతాయా ? ,లాభ మొస్తుందా ?

షేర్ : కొనండి . పెరుగుతాయి . లాభ మొస్తుంది.

1000 షేర్లు కొన్నాడు ఇన్వెస్టార్.

ఆరు నెలల తరువాత ,

ఇన్ :గోల్ మాల్ 5 రూపాయలకు వచ్చింది. పెరుగుతాయి,
లాభమొస్తుందన్నారు మీరు ?

షేర్ : మీ షేర్లు 1500 అయినాయి. ఆపరేటర్ కు లాభమొచ్చింది.
నేను చెప్పింది కరెక్టే గా .

గొంతు ఇబ్బంది

*
కొండవీటి చాంతాడంత ఉపన్యాసాలను దంచే ఉపన్యాసకేసరి వాచాల రావుగారు,
ఈ మధ్య గొంతు ఇబ్బంది వల్ల చిన్నగా మాట్లాడి ముగిస్తున్నారు .

ఎక్కువ మాట్లాడితే గొంతు కోస్తామన్న బాధిత శ్రోతల బెదిరింపే ఇబ్బందికి
కారణం .

మనసు విప్పి

*
ఆఫీసు జతగాళ్ళు కార్తీక్ ,కిరణ్ ల సంభాషణ:

"నా ఫ్రెండ్ పవన్ , నేను ఓ రోజు ఇద్దరికి ఉపయోగంగా ఉంటుందని
మనసు విప్పి ఒకరి తప్పు లొకరికి చెప్పుకోవాలనుకున్నాము"

"దానివల్ల మీకేమైనా ఉపయోగం కలిగిందా ? "

"ఆ తరువాత ఇద్దరం 5 ఏళ్ళు మాట్లాడుకోలేదు "

రెట్టింపు

*
జనాభా లెక్కల అధికారి ఓ ఇల్లాలిని వయసడిగాడు .

"ఒక్క నిమిషం లెక్క పెట్టనివ్వండి .నా పెళ్లి నాడు నా వయసు 18,
ఆయన వయసు 30 .ఇప్పుడు ఆయన వయసు దానికి రెట్టింపు,
60 ఏళ్ళు . అంటే నాకు 36 అండీ ."

విధేయుడు

*
భార్యా విధేయుల సంఘం సమావేశం జరుగుతోంది .అధ్యక్షులవారు మైకు లో

"ఆటల పోటీ లకు సభ్యులను రెండు జట్లుగా విభజిస్తున్నాము .జీవితంలో
ఒక్కసారైనా భార్య మాటకు ఎదురు చెప్పినవాళ్ళు ఎడమ వైపుకు రండి.
మిగిలిన వారు కుడివైపునే ఉండండి "

సభ ఒక్కసారిగా నిశ్శబ్దంగా మారింది .కొద్దిసేపటికి ఒక సన్నగా ,పీలగా ,
పొట్టిగా ఉన్నవ్యక్తి నీరసంగా లేచి ఎడమ వైపుకు వెళ్లి నిలబడ్డాడు .
మిగిలిన అందరు ఆరాధనగా అతన్నే చూస్తూ కుడివైపే ఉండిపోయారు .

అధ్యక్షులవారు అనుమానంగా అతన్ని ప్రశ్నించారు

"నువ్వు నిజంగా భార్యను ఎదిరించావా ? "

"అవునని చెప్పమని మా ఆవిడ వచ్చేడప్పుడు వార్నింగ్ ఇచ్చి పంపింది "

"మూడు" పదాలు

*
"సుజీ ! నన్ను గాలిలో తెలిపోయేట్లు చేసే ఆ మూడు పదాలు
నీ కోకిల కంఠంతో నా చెవి లో చెప్పవా !"

" వెళ్లి ఉరి వేసుకో "

బుజ్జి పిల్లి

*
వారం క్రితం కాపురానికి వచ్చిన కాంతామణి అప్పుడే ఇల్లు చేరిన భర్తతో ,

"ఏమండీ ! మీకిష్టమని చేసిన కొబ్బరి పాయసం,మన బుజ్జి పిల్లి తాగేసిందండీ"

"పోనీలే , బాధ పడకు ,నీకోసం వేరే చిన్ని పిల్లిని తెచ్చిపెడతాలే "

ఎవరు ?

*
లలితా !"అతనెవరు ?,మిడి గుడ్లేసుకొని, నన్ను పట్టి పట్టి చూస్తున్నాడు "

"ఆయనా ? ,పిచ్చి వాళ్ల మీద గొప్ప పరిశోధన చేసి నందుకు ఇంటర్నేషనల్
అవార్డ్ వచ్చిందాయనకు "

రేఖ చెప్పింది

*
కాంతారావు , కార్తీక్ ల సంభాషణ :

"ఒరేయ్ ! నేను చాలా సరదా మనిషినని ,నాకు మంచి ధైర్యం ,తెలివితేటలు
ఉన్నాయని రేఖ నన్ను మెచ్చుకుంది రా "

"అరేయ్ ! రేఖ మొదట్లోనే ఇన్ని అబద్దాలు చెబుతోంది .దాంతో తిరక్కు .
నాశన మైపోతావు "

అమ్మాయి తో డాన్స్

*
ఇద్దరు మిత్రుల సంభాషణ :

"నేనా అమ్మాయి తో డాన్స్ చేయలేను "

" ఏం "

" నాతోకలిసి డాన్స్ చేస్తావా అని అడిగింది "

" అందులో తప్పేముంది ? "

"నేనా అమ్మాయి తో కలిసి డాన్స్ చేస్తున్నపుడు అడిగిందీ మాట "

వరద కవి

*
కవి : నా కవితల్లో వరదొస్తోంది , మునిగి పోతారు .కాచుకోండి

విమర్శకుడు : కవి "తల్లో " వరదా ?, పెంకు లేచి పోతుంది , పారిపోండి .

ఏమి ఇవ్వాలి ?

*
"చెలీ ! నీ చిన్న ముద్దు కోసం,నీకేం ఇవ్వాలి నేను " అడిగాడు సరదా బుల్లోడు.

" క్లోరోఫాం " బదులిచ్చింది కరాటే రాణి

టీ నెప్పి

*
"నేను టీ తాగిన ప్రతిసారీ నా కుడి కంట్లో కత్తి గుచ్చినట్లుగా
నెప్పి వస్తోంది , ఏం చేయాలంటారు డాక్టర్ ? "

"కప్పు లో చెంచా తీసేసి టీ తాగండి "

హీరోయిన్

*
ఓ సినిమా హీరోయిన్ చచ్చి దెయ్యమయ్యింది. పరిచయాలైనాక
పాత దెయ్యం అడిగింది

"ఎంత వయసు లో బాల్చీ తన్నేసావు ? "

" 20 ఏళ్ల మీద కొన్ని నెలలకు "

" ఎన్ని నెలలు ? "

" 363 నెలలు "

పాడు కల

*
రూంమ్మేట్లు ఆంజనేయులు ,యాదగిరిల సంభాషణ :

"తెల్లవారుజామున పాడు కలొచ్చింది రా "

" ఏంట్రా అది "

"చార్మి,ఇలియానా ,నయనార,త్రిష, శ్రియ,అసిన్ అందరూ మా ఇంటి కొచ్చారు .
నా చుట్టూ కూర్చొని నాతో మాట్లాడారు "

"ఇది పాడు కలేంటి "

"నేనప్పుడు అమ్మాయిలా ఉన్నాను , అంజని నా పేరు "

నా తెలివితేటలు

*
మొన్న భోజనాల దగ్గర మా 7 ఏళ్ల బాబు "నేను మీలాగా ఓ చిన్న జోకు
చెబుతా నాన్నా " అన్నాడు .నేను మురిసిపోయి నా శ్రీమతితో,

"ఏమోయ్ ! హరిగాడికి అన్నీ నా తెలివితేటలే వచ్చాయి ,చూడు "అన్నాను
గర్వంగా .

"కరక్టేనండీ, నా తెలివితేటలు నా దగ్గరే ఉన్నాయి "

విడాకులు

*
అరుణ, కరుణ ల సంభాషణ :

"పెళ్ళైనప్పటి నుండీ నిన్ను కాల్చుకు తింటున్న ఆ వెధవకు, వాడే అడుగుతుంటే
విడాకులివ్వటానికి, నీకొచ్చిన ఇబ్బందేమిటే ? "

"ఆ దుర్మార్గునితో 15 ఏళ్ళు కాపురం చేశాను ,విడాకులిచ్చి వాణ్ని
సుఖ పడనివ్వటం నాకిష్టం లేదు "

కొంచం ముందుగా

*
"నిన్ను పెళ్లి చేసుకున్న తరువాతే అర్ధమయ్యింది, నువ్వెంత మూర్ఖుడివో "
ముక్కు చీదింది వనజ.

" "నన్ను పెళ్లి చేసుకుంటావా ?" అని నేను అడిగినప్పుడే అర్ధం చేసుకోవాల్సింది
నువ్వు " అన్నాడు దివాకర్ చిరాగ్గా .

పెళ్ళైన వాళ్ళతో

*
శైలజ, కృష్ణమూర్తి ఉల్లాసంగా ,ఉత్సాహంగా ప్రేమించుకొని స్వీట్ వాడికి ,
చాట్ వాడికి ,సినిమా వాడికి , పోలీస్ కు ,పెట్రోల్ బంక్ కు చదివించాల్సింది
చదివించుకొని ఒక ఇంటి వారయ్యారు.

కొన్ని రోజులకు శైలజ " ఒంటరి" పోరు మొదలు పెట్టింది.

"క్రిష్ ! పెళ్లయింతరువాత అన్ని చోట్లకు నువ్వొక్కడివే వెళుతున్నావు .
నన్నసలు తీసుకెళ్ళటం లేదు. నీకేమైంది ? "

" పెళ్ళైన ఆడవాళ్ళతో తిరిగే అలవాటు లేదు నాకు " అంటూ బయటకు
వెళ్ళిపోయాడు కృష్ణమూర్తి .

దలాల్ స్ట్రీట్ లో పోయింది

*
"మీ నాన్న కష్టార్జితం అంతా దలాల్ స్ట్రీట్ లోనే పోయిందటగా ,పాపం ! "

"అవును ,రిటైర్మెంటు డబ్బులు అన్నీ డ్రా చేసి దలాల్ స్ట్రీట్ లో వెళుతుంటే ,
దొంగలెత్తుకెళ్ళారు . "

లేడీ డ్రైవర్

*
హైదరాబాద్ లో ఆఫీసులకు వెళ్ళే టైము .రద్దీగా ఉన్న ఓ రోడ్డు.
కారు నడుపుతూ కుమార్ , అతని పక్కనే ఫ్రెండ్ ప్రవీణ్ .

"అరేయ్ ! ముందు కారు చూడరా ,పద్దతి లేకుండా ఎవత్తో నడుపుతోంది "

"డ్రైవర్ అమ్మాయేనని ఎలా చెప్పగలవురా "

" వాళ్ళే అంత చెత్తగా డ్రైవ్ చేస్తారు "

చౌరాస్థా లో సిగ్నల్ పడింది .చూస్తే, ముందు కారు డ్రైవర్ మగాడే .

"ఇప్పుడేమంటావు " అడిగాడు ప్రవీణ్ .

"వాడికి కారు డ్రైవింగ్ వాళ్ళమ్మ నేర్పి ఉంటుంది " వెంటనే జవాబిచ్చాడు కుమార్.

చేపల కూర

*
"ఏమే ! చేపలు తింటే తెలివితేటలు బాగా పెరుగుతాయని పేపరోడు రాసాడు,
ఇప్పుడే వెళ్లి చేపలు పట్టుకొస్తా . "

"మీ కోసం సొరచేప(Whale) దొరుకుతుందేమో పట్టుకురండి "
---------------------------------
ఈ రోజు ఆంధ్ర జ్యోతి లో నా జోకులు కొన్ని మక్కీ కి మక్కీ కాపీ కొట్టి
నవ్య లో "నవ్వు ఒక యోగం " శీర్షిక క్రింద ప్రచురించారు .
http://www.andhrajyothy.com/navshow.asp?qry=/2008/nov/20navya9

ఏం తెలివి ?

*
సారధి తన ఫ్రెండ్ వినోద్ ఇంటికి వెళ్ళాడు .వినోద్ వాళ్ల టామీతో చెస్
ఆడుతూ కనిపించాడు . ఆశ్చర్య పోయిన సారధి ,

"వినోద్ !నీ కుక్క ఎంత తెలివి గలదిరా .చెస్ ఆడుతోంది" అన్నాడు

"ఏం తెలివి ?,ఇప్పటికి నాలుగు గేములు ఆడితే ,మూడు గేములు నేనే గెలిచా"

వయసెక్కువ

*
టీచర్ : " మగవాళ్ళకు తల మీద జుట్టు నెరిసిన తరువాతే , మీసం
తెల్లబడుతుంది .ఎందుచేత ? "

హరి : "జుట్టు కు 16 ఏళ్ళు వయసెక్కువ ,మాస్టారూ ! "

కొత్త కవి

*
" నా ఆలోచనల అడవిలో అప్పుడప్పుడు దారి తప్పుతూ ఉంటాను "
అన్నాడు కొత్త కవి .

" తెలియని చోట , కొత్తవారు దారి తప్పటం లో ఆశ్చర్యమేముందీ "
పెదవి విరిచాడు విమర్శకుడు .

కాకతాళీయం

*
" కాకతాళీయం అంటే ఏంట్రా గోపీ ? "

"నేనూ నిన్ను అదే ప్రశ్న అడుగుదామని ఇప్పుడే అనుకున్నా "

(కాకతాళీయం = co-incidence )

మార్పు

*
రిటైరైన ఇద్దరు మిత్రుల సంభాషణ :

"నేను 20 ఏళ్ల వయసులో ధీరుభాయ్ అంబాని లా కావాలని మనసులో
గట్టిగా నిర్నయించుకొన్నాను "

" కానీ ఇప్పటికీ నువ్వు ఆయనకు 1000 కిలోమీటర్ ల దూరం లో కూడా
లేవు కదా ! "

"నేను మనసు మార్చుకొన్నాను , తేలిక గాబట్టి ."

గాటు

*
మంగలి : "నేను మీకు ఇంతకు ముందు ఎప్పుడైనా గడ్డం చేసానా సార్ ? "

సైనికుడు : "లేదు , మొహం మీద ఈ గాటు యుద్ధం లో పడింది "

శని పట్టింది

*
"రామూ ! ఏలినాటి శని పట్టిందంటే ఏడేళ్ళు బాధలు పెడుతుందంటారు ,
నిజమేనా ? "

"మా బాబాయి కి ఏలినాటి శని పట్టింది ,కానీ ఏడేళ్ళు బాధ పడలేదే ! "

"నిజంగానా ?"

"అవును ,మొదటి రోజే లారీ ఆక్సిడెంట్ లో పోయాడు పాపం "

గోళ్ళు కొరకటం

*
" చివరాఖరికి మావాడి చేత గోళ్ళు కొరకటం మాన్పించాను "

"ఎలాగేంటీ"

" షూస్ విడవకుండా తొడుక్కోవటం అలవాటు చేశాను "

నాకు రాదు

*

"మూర్ఖుడిలా నటించకు .నువ్వు చాలా మాయగాడివని నాకు తెలుసు"

అన్నాడు ఓ బడా నేత ,చోటా నేత తో .



" నాకు నటించటం రాదండి , మీరే నాకు గురువండి "

తప్పులు

*
"ఒక్క మనిషి ,ఒక్క రోజు లో ఇన్ని తప్పులు చేయటం ఎలా సాధ్యం ? "
విసిగిపోయిన మేనేజర్ అరిచాడు క్లర్క్ మీద .

" రోజూ ఆరింటికి నిద్ర లేచేవాడిని ,ఇవాళ నాలిగింటికే లేచానండీ "

ఎవరికి ఎవరు ?

*
తెలుగు బుర్రకు పదును పెట్టి కత్తిలా కరక్ట్ సమాధానం చెప్పండి :

తండ్రీ కొడుకు లిద్దరూ కలిసి పొలంలో పనిచేసు కుంటున్నారు .అత్తాకోడళ్ళు
వాళ్లకు భోజనాలు పట్టుకొచ్చారు . ఎవరి అన్నలకు వాళ్లు తినిపించారు .

ఎవరికి ఎవరు ఏమౌతారు ?

చక్కని నిర్ణయం

*
"నువ్వెంతైనా వాదించు రమా ! క్లిష్ట పరిస్థితులలో ఆడవాళ్ళ కంటే మగవాళ్ళే
సరియైన నిర్ణయాలు తీసుకోగలరు ."

" నేనూ మీ పార్టీనేనండీ శ్రీవారూ ! అందుకే మీరు నన్ను పెళ్లి చేసుకున్నారు,
నేను మిమ్మల్ని చేసుకున్నాను ."

పరిచయం

*
"గోపీ ! నువ్వు పుట్టినప్పటి నుండీ చూస్తున్నా .చాలా మంచి పిల్లాడివి .
మీ నాన్న చొక్కా జేబులోంచీ ఓ పది రుపాయలివ్వరా .పొగాకు కొనుక్కోవాలి ."
అడిగింది సూర్యకాంతం ,7 ఏళ్ల పక్కింటి అబ్బాయిని .

"నేనివ్వను , చిన్నప్పటి నుండీ నేనూ నిన్ను చూస్తూనే ఉన్నాగా "

పిసి"నారి"

*
"మా ఆవిడ చాలా పెద్ద పిసి"నారి" చెప్పాడు శేషగిరి, యాదగిరి తో

"అదేం "

"మేము ఇద్దరు పిల్లలు కావాలనుకున్నాం.ఒకే కాన్పులో ఇద్దర్నీ కనేసి
హాస్పటల్ ఖర్చులు మిగిల్చింది మా ఆవిడ ."

వంట

*
లోకంలో చాలామంది వంట వచ్చినా చేయరు .

కానీ నా శ్రీమతి చేస్తుంది ,

రాకపోయినా

దేవుడి తొందర

*
టీవీలు చూడటం ,బ్లాగులు రాయటం ,చాట్ చేయటం,పబ్ కెళ్ళటం ఆపి ,
హటాత్తుగా మన్మధరావు తలకిందులు గా తపస్సు చేసాడు .

ఇంత చేసిన తరువాత , కనపడక పోతే బాగోదని, దేవుడు ప్రత్యక్షమయ్యాడు.

" భక్తా ! ఏమి నీ కోరిక ? "

" మీరొచ్చారేమిటి స్వామీ !" .

దేవుడు కంగుతిన్నాడు.అయినా సద్దుకొని

"తొందరగా విషయం తేల్చు ,ఇంకా పది చోట్ల కెళ్ళాలి "
మళ్ళీ అడిగాడు సౌమ్యం గా

"మీరు మరీ తొందర పడ్డారు .రంభ నో ,మేనకనో పంపితే
ఎంజాయ్ చేద్దామనుకున్నా ముందు " నసిగాడు మన్మధరావు .

నిజంగా .....

*
"ఓ లక్ష ఉంటే ఇస్తావా ? , రెండు రోజుల్లో ఇచ్చేస్తాను "

" నేనివ్వను "

" ఉత్తినే అడిగా నేను "

"నేను నిజంగానే చెప్పాను "

స్నేహితులు xxx

*
కాలం స్నేహితులను విడదీస్తుంది.

డబ్బు కూడా ,

మరచిపోకురోయ్ ! పెళ్లి కూడా !

ఇంద్ర-యమ సంవాదం

*
స్వర్గానికి, నరకానికి మధ్య నున్న గోడ ఓ రోజు హటాత్తుగా కూలిపోయింది.

ఇంద్రుడు ,యముడు నువ్వు కట్టాలంటే ,నువ్వు కట్టాలని వాదులాడుకున్నారు .

గొంతు బొంగురు పోయేదాకా ఒకరిపై ఒకరు నిరసన పద్యాలు పాడారు.

అయినా తేలక పోయేసరికి ఇంద్రుడు తన పక్షాన వాదించటానికి
గట్టి లాయర్ కోసం బయలుదేరాడు .

"ఎక్కడికి వెళుతున్నావు నీవు ఇంద్రా ! , వాళ్లందరూ నా నరకంలోనే ఉన్నారు "
అన్నాడు వెటకారంగా యముడు .

హిట్లు సున్నా

*
" బ్లాగు మొదలుపెట్టి ఆరునెలలు అయింది రా .ఒక్క హిట్టు కూడా రాలేదు "

" ఇంతకీ ఒక్క టపా అయినా రాసావా "

కలిపి కూడితే

*
రేమాండ్స్ సూట్ లో పబ్ కు వెళ్ళే ఓ పేద యువకుడు , పబ్ ఓనర్ కూతుర్ని
ప్రేమించాడు .ఆమె కూడా సరేనంది .ఆమెను తనకిచ్చి పెళ్లిచేయమని అడిగాడు
కా.మా.(కాబోయే మామగారు ) ను ,

కా.మా . :" ముందు నీ సంపాదన ఎంతో చెప్పు నెలకు "

పే.యు . : " నెలకు 60 వేలు "

కా.మా . : "మా అమ్మాయి చేతి ఖర్చులకే నెలకు 50 వేలిస్తా ,తెలుసా ? "

పే.యు . : " అది కూడా కలుపుకొనే చెప్పానండీ "

నిచ్చెన

*
వినోద్ ,వంశీ ల సంభాషణ :

"మొన్న మా ఇంటికి రంగులు వేయిస్తుంటే , పని వాడొకడు 30 అడుగుల
నిచ్చెన పై నుండీ పడిపోయాడు రా "

"వాళ్ల వాళ్ళంతా వచ్చి గొడవ చేసి , నీ దగ్గర ఎంత లాగారేంటి"

"నేనొక్క పైసా కూడా ఇవ్వలేదు "

" ఎలా మానేజ్ చేసావు ? "


"అంత అవసరం ఏం లేదు .వాడు పడింది నిచ్చెన మొదటి మెట్టు పై నుండే "

కొత్త కాపురం

*
జానకిరామ్ కు కొత్త గా పెళ్లి అయ్యింది . అమ్మాయిని కాపురానికి దింపటానికి
తోడుగా వచ్చాడు తండ్రి .వచ్చి వారమైనా కదలలేదు .

"ఇంకెన్నాళ్ళు ఉంటాడు మీ నాన్న ?, పానకం లో పుడకలా మన మధ్య "

"పాపం ఆయననేమీ అనకండి .ఓ నెల రోజులుండి మీకు వంట నేర్పి రమ్మని
చెప్పి పంపింది మా అమ్మ"

పని -సుఖం

*
"రాజూ ! బాస్ అంత్యక్రియలకు బయలుదేరుతున్నావా నువ్వు ?"

"లేదు నేను రావట్లేదు "

" ఏం "

"ఆఫీసు పని చేస్తాను .నాకు పని ముందు , సుఖం తరువాత , అంతే "

అబద్దం ఆడరాదు

*
ఇద్దరు మందుబాబుల సంభాషణ :

"నువ్వెపుడైనా "లై డిటెక్టర్" ని చూసావా ? "

"చూడటమేమిటీ ?, ఒకదాన్ని పెళ్లి చేసుకుంటేనూ !"

రోజూ సినిమా

*
రాష్ట్రంలో పేరున్న పెద్ద మనుషులిద్దరు ,మందు కొడుతూ మాట్లాడుకుంటున్నారు.

"ఆర్నెల్ల నుండీ వచ్చిన ప్రతి సినిమా చూస్తున్నారా .దాంతో బుర్ర పిచ్చెక్కిపోతోంది ."

"సినిమాలు ఎక్కువ చూడనొడివి, హటాత్తుగా ఇలా ఎందుకు మారావ్ ?"

"నీ మతిమరపు మండా .సెన్సార్ బోర్డ్ మెంబర్ అయ్యింతరువాత చూడక తప్పదు గదా !"

తిరుగు లేని టపా

వర్ధమాన రచయిత్రి వాణి ,తన ఫ్రెండు పార్వతి తో మొరపెట్టుకుంది బాధగా ,

"ఈ మధ్య పత్రికల ఎడిటర్లందరూ మహా దుర్మార్గులైపోయారే బాగా. నా కథలు
నచ్చకపోతే ,వాళ్ళే ఎదురు స్టాంపులంటించి వెనక్కు పంపుతున్నారే "

"నీ రచనలు తిరిగిరాని మార్గం చెప్పనా ? " అనునయిస్తూ అంది పార్వతి .

"చెప్పవే " ఆశగా అడిగింది వాణి .

"టపాలు బ్లాగు లో పోస్ట్ చేయి , తిరిగిరావు "

గురువు వయస్సు

*
స్వామి సహస్రానంద హిమాలయాల నుండీ నేరుగా విజయవాడ వచ్చి ఓ
పెద్ద మనిషి ఇంట్లో మకాం వేసారు .కవరేజ్ కోసం వెళ్ళిన మీ TV 420
రిపోర్టర్ను అనుమతించలేదు.

ఆ రిపోర్టర్ ఓ కిటికి పక్కన మాటువేసి,గదిలో హడావిడిగా అటూ,ఇటూ
తిరుగుతున్న ఓ శిష్యుని చేతిని వొడిసి పట్టుకొని ,ముఖం మీద మైకు పెట్టాడు.
కళ్ళలో ఫ్లాష్ వేసి అడిగాడు ,

"స్వామీ !మీ గురువుగారి వయసు 1000 సంవత్సరాలని చెబుతున్నారు.
నిజమేనా ?"

"నాకు సరిగా తెలీదండీ . నేనొచ్చి 500 ఏళ్ళే అయ్యింది" అంటూ చెయ్యి లాక్కొని
హడావిడిగా వెళ్ళిపోయాడు ఆ శిష్యుడు.

కవలలు

*
మా ఫ్రెండ్ కు కవలలు పుట్టారని తెలిసింది .నాకు తీరిక దొరికి ఫోన్ చేసేసరికి
మూడు నెలలయ్యింది.

"కంగ్రాట్స్ రా కృష్ణా ! లేటైనా ఇద్దరిని ఒకేసారి కొట్టే శావు.అవున్రా !కవలలిద్దరు
ఒకే పోలికతో ఉంటారు కదా .ఎవరెవరో ఎలా కనిపెడుతున్నావు ? "

"ఏముందిరా ! హరీ కి చొక్కా తొడుగు తున్నాము .గౌరికి గౌను వేస్తున్నాము,
దాంతో మాకేం ఇబ్బంది లేదు."

దొంగ - పరుగు

*
ఉష , రాధికతో చెప్పింది బాధగా

"ఈ రోజు ఇంటి ముందు ముగ్గేస్తుంటే, ఓ దొంగ వెధవ నా మెళ్ళో ఉన్న
10 కాసుల బంగారం గొలుసు తెంపుకు పారిపోయాడే "

"నువ్వు పరుగులరాణివి కదా !, పట్టుకోలేక పోయావా ? "

" ఇంట్లోకెళ్ళి షూస్ వేసుకొని ,లేస్ కట్టుకొని వచ్చే సరికి మాయమై పోయాడే దొంగవెధవ "

రెండు వరాలు

*
డోసు బాబు గుర్రమెక్కాడు. కాలువలో పడ్డాడు .అతనికో సీసా దొరికింది .
మందనుకొని మూత తీసాడు .ఓ భూతం బయట కొచ్చింది .

"హాయ్ ! నీకు లక్ష నెనర్లు . 420 ఏళ్లకు నన్ను బయటకు తీసావు .
రెండు వరాలిస్తా, కోరుకో " అంది .

"ఎన్నటికీ ఖాళీ కాని బ్రాందీ బాటిల్ ఒకటి కావాలి " కోరాడు డోసుబాబు .

అడిగింది ఇచ్చింది భూతం . ఎత్తిన బాటిల్ దించలేదు బాబు.

మత్తులో బాబు ,గాలిలో భూతం , ఆరు రోజులు ఇది మారని సీను .

ఏడోరోజు కొంచం తల ఎత్తాడు బాబు ,ఇదే అదననుకొని రెండో వరం
కోరమంది భూతం .

" ఇలాంటిదే మరో బాటిల్ ఇవ్వు " అన్నాడు బాటిల్ ఎత్తి
తాగటానికి రెడీ అవుతూ డోసుబాబు .

బోరు

*
" T.V. చూస్తుంటే బోర్ గా ఉంది .బయటకు వెళ్దాం నాన్నా ! "

"ఏమండీ ! నాకూ T.V. చూడటం తో తలనెప్పి వచ్చింది .పార్క్ కెళ్ళి
రిలాక్స్ అవుదామండీ ."

" 24 గంటలూ T.V. చూస్తే అంతే మరి " అని విసుక్కుంటూ చొక్కా
తొడుక్కున్నాడు కుటుంబ రావు .

నల్లని కురులు

*
"దేవీ ! నీ నల్లని కురుల రహస్యమేమీ ? "

" రోజూ తప్పకుండా హెయిర్ డై వాడతాను స్వామీ ! "

బ్లాగు హిట్లు

*
బ్లాగు మిత్రుల సంభాషణ :

" నా బ్లాగుకు ఒక్క రోజులో 20 వేల హిట్లు వచ్చాయి . "

"ఎన్నింటికి వచ్చిందేమిటి కల ? "

మొదటి బహుమతి

*
"ఏమండీ ! ఫ్యాన్సీ డ్రెస్ పోటీ లో "కలకత్తా కాళి " వేషం వేస్తే రెండో బహుమతి
వచ్చిందండీ ! " గర్వంగా భర్తతో చెప్పింది భవాని

"మేకప్ లేకుండా వెళితే మొదటి బహుమతి వచ్చేది కదా " అన్నాడు భవాని పతి.

ఎవరు గొప్ప ?

ఆంధ్ర దేశం లో పూర్వం వీరభద్రుడు, కాళీ పుత్రుడు అనే గొప్ప మాంత్రికులు
ఉండేవారు. ప్రజలు తమ కష్టాలు పోగొట్టుకోవటానికి కాళీ పుత్రుని వద్దకు
ఎక్కువగా వెళ్ళేవాళ్ళు .అలాఅని వీరభద్రుడేమీ తక్కువ కాదు. అతని పేరు
చెబితేనే భూతాలు, దెయ్యాలు భయంతో వణుకుతూ పారిపోయేవి .

ప్రజలు కాళీ పుత్రుని ఎక్కువగా ఆదరించటానికి గల కారణాలు తెలుసుకోవాలని
వీరభద్రునికి అనిపించింది .

శాస్త్రవిషయాలలో తామిద్దరూ సమవుజ్జీలు .ఎంత ఆలోచించినా వేరే కారణాలేవీ
తెలియలేదు .ఈ విషయం కాళీపుత్రునే అడగాలని వెళ్ళాడు వీరభద్రుడు.

ప్రశ్న విని కాళీపుత్రుడు నవ్వుతూ ఇలా చెప్పాడు

"వీరభద్రా!నా కంటే నువ్వే ఎక్కువ దెయ్యాలను వదలగొట్టావు .కానీ నేను

ఒకదాన్ని కట్టుకొని ,20 ఏళ్ళ నుండీ కాపురం చేస్తున్నాను ."

వీరభద్రుడు వెంటనే దాసోహం అంటూ కాళీపుత్రుని కాళ్ళపై పడ్డాడు.

కష్టాలు

"రాధీ! నీ కళ్ళల్లోకి అలా చూస్తుంటే నా కష్టాలన్నీ మరచిపోతున్నా "

"మనకింకా పెళ్లి కాలేదు కదా ,అప్పుడే నీకు కష్టాలేంటి రాజూ !"

చేతినిండా పని

"ప్రపంచం లోని స్త్రీ ,పురుషులందరికీ చేతినిండా పని కల్పించటం ఎలా ? "
అన్న విషయం మీద ఓ సైంటిస్ట్ ౩౦ ఏళ్ళు పరిశోధన చేసి ,కనుగొన్న
పరిష్కారం

"ప్రపంచం లోని స్త్రీ లందరినీ సముద్రానికి ఒకపక్క ,పురుషులందరినీ మరోపక్క
ఉంచితే ,అందరూ పడవలు తయారు చేసుకొనే పనిలో పడతారు ."

తెలీదు పాపం

పుణ్య దంపతులెవరో ఒకరి మీద ఒకరు పడి కొట్టుకుంటున్నారు .
ఆయన ఆవిడ కొప్పు పట్టుకున్నాడు .ఆమె ఆయన జుట్టు పట్టుకుంది .

అది చూస్తున్న రాణి మొగుడితో

"ఎంత మొగుడు కొప్పట్టుకుంటే మాత్రం ,అలా జుట్టు పట్టుకుందేంటి ?"

" ఆమెకు నీలాగా గొంతు పట్టుకోవటం తెలీదు పాపం " లోగొంతుకతో అన్నాడా భర్త .

మీరే కరక్ట్

భార్యా భర్తల మధ్య మాటల యుద్ధం తీవ్రంగా సాగుతోంది .

"నువ్వు చాలా మంచి దానివని ,నన్ను ప్రేమిస్తున్నావనుకొని చేసుకున్నా నిన్ను "

" తెలివితక్కువదాన్ని ,నేను అట్టాగే అనుకున్నాను . మీరే కరక్ట్ "

ఆ మాత్రం తెలివి ....

"ఏమండీ ! అమ్మాయి పెద్దదైయింది .తొందరలో పెళ్లి చేయాలి.
సంబంధాలు చూడండి "

"నిదానంగా చూద్దాం.తొందరపడి ఏ సన్నాసి కో ఇచ్చి చేస్తే ,
పిల్ల కష్ట పడుతుంది ." అన్నాడు బద్దకపు మొగుడు .

"ఆ మాత్రం తెలివి మా నాన్నకు లేకపోయింది "సణిగింది ఆ ఇల్లాలు .

రోబోట్

రోబోట్ల ఎక్సిబిషన్ జరుగుతోంది .సేల్స్ మాన్ ఒక రోబోట్ గురించి

"ఈ రోబోట్ కదలకుండానే మీ ఇంట్లో ఉన్న దుమ్ము ,ధూళి ,బూజు అన్నీటి
గురించి మీకు చెబుతుంది .న్యూస్ పేపర్ చదివి వినిపిస్తుంది ."

"తనేం శుభ్రం చేయదా " అడిగిందో ఇల్లాలు .

"ఆ సదుపాయం దీంట్లో లేదు మేడం "

"ఆ మాత్రం దానికి ఇదెందుకు ?, ఆ పని మా ఆయనే చేస్తాడుగా రోజూ ,
కుర్చీలో కూర్చుని అరుస్తూ " పెదవి విరిచింది ఆ ఇల్లాలు .

తెలుగు పాట

ఈ రోజుల్లో అమెరికా లో రియల్ ఎస్టేట్ వ్యాపారులు ,ఆ గొర్రెల తోక పట్టుకుని
గుండు కొట్టిచ్చుకొన్న ఆర్ధిక సంస్థలు ఒక తెలుగు పాట లోని చరణాన్ని
బృందగానం చేస్తున్నాయి .


అది మీకు తెలుసా ?


"అంతా మట్టేనని తెలుసు , అదీ ఒక మాయే నని తెలుసు ,తెలిసీ తెలిసీ ..............."

గిరీష్ భార్య

చిన్నప్పటి మిత్రులు గిరీష్, రమేష్ చాలా కాలానికి కలుసుకున్నారు .

గిరీష్ తన భార్య గురించి చెపుతూ

"మా ఆవిడను చూసి , ఎంత పెద్ద మగాడైనా నోరు తెరవాల్సిందే ."

" మీ ఆవిడ అంత అందం గా ఉంటుందా ? " అడిగాడు రమేష్ .

"లేదు , ఆవిడ పళ్ళ డాక్టర్ " అసలు విషయం చెప్పాడు గిరీష్ .

పక్కింటి పిన్నిగారు

వారం రోజుల క్రితం ,తమ పక్క వాటా లో అద్దెకు దిగిన కొత్త పెళ్ళికూతురు కామాక్షి తో మీనాక్షమ్మ ,

"ఏమే కామాక్షి ! తప్పుగా అనుకోకపోతే ఓ చిన్న మాట.మీ ఆయన రోజూ కొత్త అమ్మాయిలను వెంటేసుకొని వూరంతా తిరుగుతూ ఉండటం మా ఆయన చూసారు . నీకు తెలుసా ?"


"తప్పదండీ పిన్నిగారు ,అంతా తెలిసే చేసుకున్నా .ఆయన టూరిస్ట్ గైడ్ మరి ." నవ్వుతూ చెప్పింది కామాక్షి .

బస్సు సంభాషణ

హైదరాబాద్ . అందరూ ఆఫీసులకు ,కాలేజీలకు ,స్కూళ్ళకు వెళ్ళే టైము .ఓ రష్ గా
ఉన్న బస్ లో వినిపించిన మాటలు ,

"తమ్ముడూ! అలా మీదపడి తగులు కుంటూ నుంచోపోతే ఇటు పక్కకు రా ."

"అక్కడ మీ అమ్మాయి ఉందిగా "

"పోనీ అటు నుంచో "

"మీ కోడలుంది కదా "

"సరే నా పక్కన నుంచో "

" అలాగే అక్కా !"

ప్రహ్లాదం

హిరణ్యకశిపుడు, తన ఆంతరంగిక మంత్రులతో రహస్య సమావేశం ఏర్పాటు
చేసాడు .ప్రహ్లాదుని మార్చటం ఎలా? అన్నదాని మీద చాలా చర్చ జరిగింది .

ప్రహ్లాదుని బడి మార్చి , ఆంధ్రప్రదేశ్ లోని కార్పోరేట్ రెసిడెన్సియల్ స్కూల్ లో వేయాలని నిర్నయించారు .

అలాగే చేసారు . కాని హరి నామం విడువలేదు ప్రహ్లాదుడు .ఎందుకిలా జరిగిందని
అందరు తలలు పట్టుకొన్నారు.వాళ్ళలో ఒకడికి బల్బ్ వెలిగింది .

ప్రహ్లాదుని స్కూల్ పేరు " నారాయణ రెసిడెన్సియల్" అని .

పని లేని దెయ్యం

ఓ ఋషి ధ్యానం ముగించి కళ్లు తెరిచాడు . తనకు కొద్ది దూరం లో ఓ దెయ్యం నీరసంగా కూర్చుని కనిపించింది .

"ఓ దెయ్యమా !ఏ అల్లరి ,ఆగం చేయకుండా నీరసం గా ఉండిపోయావేమిటి ? " పలకరించాడు ఆయన .

"లోకం లో వందల కొద్ది బాబాలు, స్వాములు తామే దేవుళ్లమని చెప్పుకు తిరిగేస్తూ ఉంటే ,ఇంకా నాకేం మిగిలింది చేయటానికి ? " నిరాశగా పలికింది ఆ దెయ్యం .

ఉచితం

విజయవాడలో కొత్త వ్యాయామశాల(జిం) తెరిచాడు వీరాంజనేయులు. జిం ముందు ఇలా బోర్డ్ పెట్టాడు.

"మా జిం లో చేరిన ప్రతివారికీ ఈత పూర్తిగా ఉచితం "

అంకారావు అడిగాడు ఉత్సాహంగా "ఈత ఎక్కడ సార్ మరి ? "

"కృష్ణ లో " బదులిచ్చాడు వెంటనే వీరాంజనేయులు.

ఈ రోజు

దసరా పులి వేషానికి ప్రాక్టీస్ చేసి ,అర్ధరాత్రి ఇంటికొస్తుంటే మా
సందు లోని గ్రామసింహం పిక్క పట్టుకుంది .



అందువల్ల చేత ఈ రోజు అంతా........... ఏడు"పులే " .

ఏకాంతంలో

వాసు , లక్ష్మి తో

"ఈవేళ మా వాళ్లందరూ వూరు వెళ్లారు. మా ఇంటి కొస్తే ఏకాంతం గా గడపచ్చు .వస్తావా ప్లీజ్ ! "

" వస్తే నన్నేమైనా చేస్తావా ? " అనుమానంగా అడిగింది లక్ష్మి .

"నామీదొట్టు ,నిన్నేం చేయను " నమ్మకంగా చెప్పాడు వాసు .

"అయితే అక్కడెందుకు ?, బిగ్ బజార్ లో కలుద్దాం '' అని విసురుగా వెళ్ళిపోయింది లక్ష్మి .

బ్లాగరి తపస్సు

ఓ బ్లాగరి దేవుడి కోసం ఘోరమైన తపస్సు చేసాడు. ఆయన ప్రత్యక్షమై వరం కోరుకో మన్నాడు .

"దేవా ! నేను రాసే ప్రతి టపాపై చర్చలు, కామెంట్లు ఉండేట్లు అనుగ్రహించు " కోరాడు బ్లాగరి

"నాకు బ్లాగుట రాదు.లేనిచో అవి నేనే రాయుదును. ఇతర బ్లాగర్లను లైనులో పెట్టుట నావల్ల కాదు .వేరే దేవుడిని
ట్రై చేసుకో " అంటూ మాయమైపోయాడు దేవుడు .

ఆ బ్లాగరి ఎవరు ? తెలిసి చెప్పక పోతే మీ టపాలకు కామెంట్స్ రావు .

P.S.: ఈ టపాకు 437 కాపీలు రాసి తోటి బ్లాగర్లకు పంపండి .మీ టపాలకు చూడలేనన్ని కామెంట్స్ పొందండి .

బాల స్వామి లీలలు

బాల నరసింహ స్వామి, భక్తులకు తన బాల్య లీలలను వివరిస్తున్నారు

"నా చిన్నప్పటి నుండీ నా కంటికి దగ్గరలో ఉన్న ఏ వస్తువునైనా దగ్గరకు రావాలని మూడు సార్లు గట్టిగా పలకంగానే అవి నా చేతిలో వుండేవి. "

అదివిన్న ఓ పండు ముసలమ్మ సన్నగా గొణిగింది

"ఈ కోపిష్టివాడికి ఆ వస్తువులు అందిచలేక చిన్నపుడు అమ్మగా నేను చచ్చేదాన్ని .ఇప్పుడు శిష్యులు చే(చ)స్తున్నారు,భక్తులకు తెలియకుండా."

నిదానమే ప్రధానం

పెద్ద ట్రాఫిక్ జంక్షన్ .ఉదయం 9 గంటలు. ఓ 85 ఏళ్ల ముసలాయన వేగంగా నడుస్తూ
తనకు 30 అడుగుల దూరంలో బజాజ్ పల్సర్ బైక్ పై వెళుతున్న కూర్మారావుకు ఎదురు నిలబడి అరిచాడు

"నీకు బుద్దుందా ?,ఈ టైం లో ,ట్రాఫిక్ అంతా ఆగేట్టు ఇంత నెమ్మదిగా బండి నడుపుతావా ?"

ఈ హడావిడికి తప్పదు కాబట్టి వచ్చిన ట్రాఫిక్ పోలీస్ " బైక్ పక్కన పెట్టి, ముందు
నీ లైసెన్స్ ,బండి కాగితాలు బయటకు తీయ్ " అన్నాడు .


కూర్మారావు తన లైసెన్స్ చూపించాడు . అది రోడ్ రోలర్ డ్రైవింగ్ లైసెన్స్ .

మారని పాఠం

మూడవ తరగతి చదువుతున్న రాధిక , మోనిక మాట్లాడు కుంటున్నారు .

" మనం క్లాస్ మారినప్పుడల్లా అన్ని టెస్ట్ బుక్స్ లోని పాఠాలు మారిపోతున్నాయే, కాని ఎక్కాల పుస్తకం ,అట్లాస్ లోనివి మాత్రం మారట్లేదే " అంది రాధిక .

"ఆ పుస్తకాల వాళ్లు ఎక్కువ చదువుకో లేదేమో పాపం " తన మనసు లోని మాట చెప్పింది మోనిక .

తెలుగు పదాలు

.

HELMET : బుర్ర మూకుడు

.

FIRE ENGINE : కొంప లార్పు యంత్రము

మిమ్మల్ని హింసించటానికి--నా తవిక

నా పదునాలుగేళ్ళ వయసు లో రాసిన ఈ తవికను ,నేనూ కవినే అని అనిపించుకోవాలన్న దురద తో ఇక్కడ రాస్తున్నాను . మీ తిట్టు కవిత్వాన్ని వ్యాఖ్యలలో పొందుపరచండి .

కవిత వనిత

.

కవి తలలో
వికసించి సుగంధాలు వెదజల్లే

తత్వం కవిత

.

వరించి

నిరంతరం పురుషుని

తరింపచేసేది వనిత

స్వామి లీలలు

చిదానంద స్వామి తన బాల్యం లో జరిగిన సంఘటనను భక్తులకు వివరిస్తున్నారు " నా పద్నాలుగో ఏట ,అడవి గుండా వెళుతున్నపుడు ఓ సింహం నన్ను తినబోయింది. అప్పుడు దైవాన్ని గట్టిగా స్మరించాను .సింహం వెంటనే
వెళ్ళిపోయింది .దీనివల్ల మీకేం తెలిసింది ? "

"దైవం కూడా పొరపాటు పడవచ్చని " సన్నగా అన్నాడు ,గత 10 ఏళ్ళుగా సప్లయి చేసిన ఏన్నో వేల వీభూతి బస్తాలకు పైసా కూడా డబ్బులు రాని ఓ వ్యాపారవేత్త .

M.P. గోల

M.P. మైకాసురరావు అరుస్తున్నాడు గట్టిగా " అధ్యక్షా ! మా ప్రాంతానికి జరిగిన అన్యాయానికి నిరసనగా నా M.P. పదవికి రాజీనామా చేస్తున్నాను "

ఇంతలో వాళ్ళావిడ పిలిచింది ఆదుర్దాగా ..

"మీ కల మండా !, కళ్లు తెరిచి T.V. లో చూడండి .రాష్ట్రపతి లోక్ సభను రద్దు చేసారు"

తెల్ల కాగితం

సూక్ష్మం

"మీరు ?"


"నేనే "

పిల్ల గొడవ

మా ఆవిడ ,నేను మంచి మూడ్ లో ఉండగా చూసి మొదలు పెట్టింది

" ఏమండీ,మీరు జోక్స్ రాయటం మానేయండి బ్లాగుల్లో ."

"ఎందుకు ?" ఆశ్యర్యపోతూ అడిగాను నేను .

"మీరు నవ్వుతు,నవ్విస్తూ ఉంటే పెళ్లి కాలేదనుకొని , ఏ బ్లాగు పిల్లో వెనకబడితే,నా బతుకేం కావాలి " నిష్టూరం గా అందావిడ .

ఇష్టం

సుభాషిణి పొరుగూరు వెళ్ళిన భర్త తో ఫోన్ లో " ఏవండి ,మీకు బాగా ఇష్టమైన వాళ్ళని చూడాలనిపిస్తే వెంటనే ఏం చేస్తారు ? " గోముగా అడిగింది .

"వెంటనే వెళ్లి అద్దం ముందు నిలబడతాను " అన్నాడు సుధాకర్ .

అందం

పదహారేళ్ళ వయసులో కోతి కూడా అందముగా ఉండును .

ఎన్నాళ్ళో ..... వేచిన ఉదయం

సావిత్రమ్మకు తన భర్త కంటే ముందు వెళ్ళాలని గట్టి కోరిక .

కొద్ది రోజులు గా భర్త ఆరోగ్యం అంతగా బాగుండటం లేదు .

నెల రోజుల తర్వాత ఆమె కోరిక తీర్చుకుంది " చిరంజీవి కొత్త సినిమా మొదటి రోజు మార్నింగ్ షో కు వెళ్లి"

అది ఆమె భర్త పోయిన 13 వ రోజు .

పిచ్చి కారణం

సునీల్ ,పిచ్చాసుపత్రి పెద్దడాక్టర్ బ్రహ్మానందం ను బతిమాలుతున్నాడు .

"సార్,నాకు ఇద్దరు పేషెంట్ల వివరాలు కావాలి. వారితో నేను మాట్లాడాలి ."

" ఎందుకు"

"వాళ్లకు పిచ్చి ఎలా ఎక్కిందో తెలుసుకోవటం నాకు చాలా అవసరం సార్ "

"వాళ్లు నీకే మౌతారు ?"

"ఏమీ కారు ,మా ఆవిడ వేపు చుట్టరికం సార్ "

" ఆవిడకు ఎలా "

"ఒకరు ఆమె మాజీ భర్త ,మరొకరు పాత ప్రియుడు "

శాపం

విశ్వామిత్రుడు ఘోరతపస్సు చేస్తున్నాడు .భగ్నం చేయటానికి రంభను పంపాడు ఇంద్రుడు .కాలం గడుస్తోంది .రంభ నుండి సమాచారం లేదు.

విషయం తెలుసుకోవటం కోసం స్వయంగా బయలుదేరాడు.

రంభ తీవ్రంగా తపస్సు చేస్తూ కనిపించింది .

"ఆయన తపస్సు చెడగొట్టమని పంపితే ,నువ్వు చేస్తున్నావేమిటి ?" ఆగ్రహించాడు ఇంద్రుడు .

"తపశ్శక్తి చేత శాపమిచ్చి ,ఆయన తపస్సు చెడగోడదామని " వినయం గా బదులిచ్చింది రంభ.

రెండు ఫోన్లు

శాస్త్రి గారికి రెండు సెల్ ఫోన్లు.

ఒకటి "మడిలో" వాడుకోవటానికి.

మరొకటి మామూలు వాడకానికి .

బ్లాగు సన్యాసం

ఓ బ్లాగరి తన మిత్రునితో ఇలా వాపోయాడు "నేను ఎంత మంచి టపాలు రాసినా ,కొందరు బ్లాగర్లు నా టపాలపై చెత్త కామెంట్ల తో టపాలు రాస్తున్నారు .కొందరైతే టపాలు రాయటం మానేయమని ,లేకపోతే బ్లాగు యముడు నన్ను పట్టుకు పోతాడని శాపనార్ధాలు పెడుతున్నారు .దాంతో చాలా బాధపడి మానేసాను రా నేను ."


"మానేశావా ?" నమ్మలేనట్లు అడిగాడు మిత్రుడు .


"అవున్రా , మానేసాను "వారి బ్లాగులు చూడటం " "

నిండు సున్నా -- గుండు సున్నా

ఈ .....................వేళ

ఇల్లలుకుతూ ఈగ తన పేరు మర్చి పోయింది .

వేట కెళ్ళి తెచ్చిన ఏడో చేప ఎండలేదు .

అందుచేత ఈ వేళ ఏమీ రాయలేదు .


మీకు కల్గిన ఈ సౌకర్యానికి ఆనందిస్తున్నాము .

పాపం భార్య

బకాసుర రావు భోరున ఏడుస్తూ పోలీస్ స్టేషన్ కు వచ్చాడు. తన భార్య 20 రోజుల క్రితం ఆఫీసు కు వెళ్ళిన తరువాత నుండి కనపడటం లేదని వెంటనే ఆమె ఆచూకి కనిపెట్టమని బతిమాలాడు.

అంతా విని S.I. అడిగాడు "20 రోజుల నుండి కనిపించక పోతే ఇప్పుడు కంప్లైంట్ ఇచ్చావేమిటీ?"

" ఈరోజు పొద్దున్నే ఇంట్లో బియ్యం ,పప్పులు అయిపోయాయి సార్ " అన్నాడు బకాసుర రావు

జీవిత రేఖ

క్రాంతికుమార్ , విశ్వనాథ్ హైవే మీద బఠానీలు తింటూ నడుస్తున్నారు .వెనకనుండి లారీ ఒకటి వేగంగా వస్తోంది .క్రాంతికుమార్ కంగారు గా "విశ్వం, తొందరగా పక్కకు రారా " అన్నాడు. విశ్వనాథ్ నవ్వి తన కుడిచేయి చూపిస్తూ " నా చేయి చూడరా ! , జీవితరేఖ జెర్రిగొడ్డు లా బ్రహ్మాండం గా ఉంటేను ."

" నీ చేతిలో రేఖ నీకు ,నాకు కనిపిస్తోంది కాని , లారీ డ్రైవర్ కు కనిపించదు కదా " అంటూ పక్కకు లాగాడు క్రాంతికుమార్ విశ్వనాథ్ ని .

నా ప్రపంచం ---10,000 హిట్స్

నా ప్రపంచం 10,000 హిట్స్ సాధించటం చాలా మంచిదే . కాని 10,000 వ పాఠకుడు అదృష్ట వంతుడు అని అన్నారు C.B.RAO గారు. అదృష్టాన్ని వారు నమ్ముతున్నారన్న మాట. మిగిలిన 9,999 హిట్స్ ఇచ్చిన వారు ఏమిటి ? .అనుకోకుండా జరిగిన విషయాలు మన కొలబద్ద తో చూడటం వల్ల అదృష్ట, దురదృష్ట లని పేరు పెడతాం .ఇలాంటి కొన్ని వేల విషయాలు కొన్నాళ్ళకు ఆచారంగా , మతం గా మారిపోతాయి .కొన్ని సంకేతాలు ఏర్పడతాయి . మూఢనమ్మకాలను వదిలించే బ్లాగు కు కూడా " అదృష్టం" పట్టింది .అందువల్ల మనకు తెలిసే విషయం ఏమిటంటే ఎల్లపుడు మనిషి rational గా ఉండటం సాద్యం కాదు. కొంత వింత ,వినోదం కూడాఅవసరమే. అవి మన ప్రగతి కి అడ్డు పడనంతవరకు .

పలుకని చిలుక

దుర్గా రావు ఎంతో ముచ్చటపడి బాగా మాట్లాడే చిలకను కొన్నాడు .దాన్ని ఇంట్లో పెట్టి పని మీద బయటకు వెళ్లి వచ్చాడు. భోజనం చేస్తుంటే చిలక జ్ఞాపకం వచ్చింది .భార్యను అడిగాడు .

"మీరు ఇప్పుడు తింటున్నది దాని కూరేనండీ " అంది భార్య .

"ఎంతపని చేసావే ?, దానికి పదహారు భాష లొచ్చు." అరిచాడు కోపం,బాధ కలసిన గొంతుతో దుర్గారావు .

" ఆమాట దాన్ని పట్టుకొని కోసేటప్పుడు ఏ ఒక్క భాషలోనైనా చెప్పిచావలేదే మరి !" అడిగింది ఆశ్చర్యంగా అతని భార్య.

పుట్టినరోజు కానుక

కొత్త పెళ్ళికూతురు ఊర్మిళ ,తొందరలో వచ్చే భర్త పుట్టినరోజు న అద్భుతమైన కానుక తో ఆశ్చర్య పరచాలనుకుంది.మెగా గిఫ్టు షాపీ కి వెళ్ళింది .మూడు గంటల పాటు సేల్స్ మెన్ అందరిని విసిగించింది .ఏవీ అద్భుతం గా లేవంది.

అప్పుడు,ఆమెతో విసుగెత్తిన 21 వ సేల్స్ మాన్ " మేడం ! మీకు ఒక కానుక గురించి చెబుతాను .అది మీ భర్త ను బాగా ఆశ్చర్య పరుస్తుంది " అన్నాడు .ఆమె శ్రద్ధ గా వినసాగింది .

"మీ భర్త బయట నుండి ఇంటికి రాగానే ,మీరు తలుపు వెనకనుండి ఒక్కసారిగా హ్యాపీ బర్త్ డే అంటూ అతని ముందుకు ఉరకండి " కసిగా ముగించాడు సేల్స్ మాన్ .

చదువా ? పెళ్ళా ?

కుటుంబ రావు P.G. లో యూనివర్సిటి గోల్డ్ మెడల్ సంపాదించిన తన కూతురు సుజాత తో " నువ్వు ఇంకా చదివితే , నీ చదువు కు తగ్గ వరుణ్ణి తేవటం కష్టం .పెళ్లి చేద్దామంటే నా స్థితి కి గుమాస్తా ను మాత్రమే తేగలను. నీ అభిప్రాయం ఏమిటో చెప్పమ్మా ! "

"నేను P.H.D. చేస్తూ పెళ్లి చేసుకుంటా నాన్నా .మీకు ఆర్ధికంగా భారం కల్గించను."

బూతు చిలక

వెంగల రావు మంచి చిలకను కొనటానికి షాపుకు వెళ్ళాడు .ఓ చిలకను చూపించి షాపువాడు " ఇది చాలా మంచిది సార్ , చక్కగా , గౌరవంగా మాట్లాడుతుంది, తెలివైనది,విశ్వాసంగా ఉంటుంది సార్. " అని చెప్పాడు .

ఆ చిలక ను కొని ఇంటికెళ్ళాడు వెంగళరావు .మరుసటి రోజు ,వాళ్ల ఆఫీసర్ ఇంటి కొచ్చారు.చిలక నోటినుండి "బూతు , బండ బూతు" లు .

వెంగల రావు వెంటనే వెళ్లి , షాప్ వాడి చొక్కా పుచ్చుకున్నాడు.

"సార్ ! నాకే పాపం తెలియదు సార్, రెండు రోజుల క్రితం దీన్ని ఓ తాగుబోతాడు కొనుక్కెళ్ళాడు.ఈ బూతులు వాడి దగ్గర నేర్చుకొని ఉంటుంది." అన్నాడు షాపువాడు .

కాఫీ లో

కాంతారావు తనకిచ్చిన కాఫీ ని త్రాగబోతూ , కోపం గా వెయిటర్ ను పిలిచాడు

"ఈ కాఫీ లో దోమ పడింది ,కనపడట్లా ? "

"మీ కాఫీ లో దోమ పడలేదు సార్ " వినయం గా అన్నాడు వెయిటర్ .

"దోమ పడితే పడలేడంతావా ?,నీ విషయం ఇప్పుడే తేలుస్తా " అంటూ కాఫీ గ్లాస్ తో ఓనరు దగ్గరకు వెళ్ళాడు కాంతారావు .అంతా విని ఓనరు " మా వెయిటర్ చెప్పింది నిజమే సార్ .మా హోటల్ లో ఒక్క దోమ కూడా లేదు. " అన్నాడు.

కాంతారావు కోపం నషాళానికి అంటింది .హెల్త్ ఆఫీసర్ కు ఇప్పుడే కంప్లైంట్ ఇస్తాను అంటూ విసురు గా బయటకు నడిచాడు.

"ఇచ్చే కంప్లైంట్ సరిగా ఇవ్వండి .మీ కాఫీ లో పడింది దోమ కాదు , ఈగ " వెనక నుండి అరచి చెప్పాడు హోటల్ ఓనరు .

తాగుబోతు కొంప

పానకాల రావు తప్పతాగి తూలుతూ అర్ధరాత్రి ఓ ఇంటి తలుపు కొట్టాడు . తలుపు తెరుచుకోలేదు . "ఏమే ! మొగుడొస్తే తలుపు తీయవేంటే, ఎక్కడ చచ్చావు " అరిచాడు .

ఆ ఇంటి ఇల్లాలు ఓరగా తలుపు తీసి, " ఇది మీ ఇల్లు కాదు, గొడవ చేయకుండా వెళ్ళండి " అంటూ తలుపు వేసేసింది .

ఇదంతా చూస్తున్న ఆమె నాలుగేళ్ల పాప "అమ్మా , నాన్న కు అలా అబద్దం చెప్పి తలుపు వేసేసా వేమిటి " అని అడిగింది .

" ఓ 3 గంటలాగి మత్తు దిగిం తరువాత వస్తాడులే , మనం అప్పడిదాకా హాయ్ గా పడుకోవచ్చు " అంది ఆ ఉత్తమ ఇల్లాలు .

స్వర్గం

సూర్య కాంతం చనిపోయింది .యమ భటులు ఆమెను లాక్కెళ్ళటానికి వచ్చారు. దేవదూతలు వారిని అడ్డుకుని, తమ దగ్గర వున్న పతివ్రతల లేటెస్ట్ లిస్టు లో ఆమె పేరు ,వివరాలను చూపించారు. అవి :

పేరు : సూర్యకాంతం

వయసు : 78

స్వర్గం లభించటానికి కారణం :భర్త కు సదా ఆనందాన్ని ఇచ్చిన , 18 వ ఏటా అలిగి చనిపోయే వరకు సాగించిన " మౌన వ్రతం " యొక్క పుణ్యం.

పేక మేడలు

పేకాట పాపా రావు ఓ పెళ్లి లో అప్పుడే పరిచయమైన ఆయనతో " పేకాట తో నేను మూడంతస్తుల భవనం కట్టాను" అన్నాడు, ముక్కలు కలుపుతూ .

"పేకాడి నేనూ కట్టాను , ఓ చిన్న ఇల్లు, పెద్ద మహల్ అమ్మి " అన్నాడాయన దూరం గా జరుగుతూ .

ఏ చేయి ?

శ్రీకృష్ణుని విశ్వరూపం బొమ్మ చూపిస్తూ తన రెండేళ్ళ పిల్లవానికి అన్నం పెడుతోంది తల్లి .

"కన్నా, చూడు ఈ దేవుడికి వేయితలలు , వేయి చేతులు , వేయి కళ్లు ,వేయి కాళ్ళు "

"అమ్మా! ఈ దేవుడు వాళ్ల అమ్మ అన్నం పెడితే ,ఏ చేత్తో అన్నం తింటాడే ? " ముద్దుగా అడిగాడు చిన్న గోపన్న .

ఏ పార్టీ ?

రోజుకో పార్టీ మార్చే మారుతి రావు ఇంటి తలుపు కొట్టారు కార్యకర్తలు .

అతని నాలుగేళ్ల పాప తలుపు తీసింది .

"పాపా ! మీ నాన్న తెలుగు దేశం లో వున్నాడా ? , కాంగ్రెస్ లో వున్నాడా ? , తెరాస లో వున్నాడా ? " అడిగారు కార్యకర్తలు .

"మా నాన్న ఇప్పుడు బాత్రూం లో వున్నా డండి " అమాయకం గా జవాబు ఇచ్చింది పాప .

ఎర్ర కారు

డాక్టర్ పిచ్చేశ్వర రావు పేషెంట్ ను ,

" కుమార్ , ఎర్ర కారు అంటే మీకు అంత భయం ఎందుకు ? "

" ఏడు సంవత్సరాల క్రితం మా ఆవిడను ఎర్ర కారు వాడొకడు తీసుకువెళ్లి పోయాడు డాక్టర్ "

" ఓ.కే. , మరి భయం దేని గురించీ ? "

"మళ్లీ వాడు మా ఆవిడను తీసుకొచ్చి అప్పగిస్తా డేమో అని డాక్టర్ "

నీకు నాకు మధ్య

ఓ మౌన గీతం ,
ఓ ఉదయరాగం ,
ఓ కుంచెగీత ,
ఓ అక్షరచిత్రం ,

హృదయాల అద్వైతం ,

ఇంకేం వున్నాయ్ చెప్పు ?

ఉంటే అవి కూడా ........... .

వస్తాదు

"అందర్నీ తన కండలు చూపి భయపెడుతుంటాడే , ఆ వస్తాదు భీమారావు ఆ పెద్దావిడను చూసి అలా తలదించుకొని వెళ్లి పోయడే " అడిగాడు రాము ఆశ్చర్యంగా .

"ఆ పెద్దావిడ అతని అత్తగారులే " విషయం చెప్పాడు కిరణ్ .

అప్పుడే

అప్పా రా వు తన భార్య అంత్యక్రియలు పూర్తిచేసి ఇంటికి బయలుదేరాడు.అంతలో ఉరుములు , మెరుపులతో పెద్ద వర్షం మొదలయింది .

" అప్పుడే అక్కడకు చేరిందా ?," మా ఆవిడ అని ఆశ్చర్యపోతూ ఆకాశం వంక చూసాడు కళ్లు పెద్దవి చేసుకొని .

విడాకుల కోసం

తొమ్మిదేళ్ళ కాపురం బోర్ కొట్టి కుచేల రా వు , సంతానలక్ష్మి విడాకుల కోసం కోర్ట్ కెక్కారు .

జడ్జి : "మీకు విడాకులు ఇస్తాం, కాని మీతొమ్మిది మంది పిల్లల భారం ఇద్దరూ సమానంగా
చూసుకోవాలి ."

"పదవేలక్ష్మీ ! పది నేలలాగి వద్దాం " అన్నాడు కుచేల రా వు వెంటనే భార్యకు కన్ను గీటి .

ప్రేమ పెళ్లి

రజియా , రాబర్ట్ ప్రేమించుకొని పెళ్లికి రెడీ అయ్యారు.

ఫ్రెండ్స్ అందరికి శుభలేఖలు అందాయి .

పెళ్లి రోజు , ఫ్రెండ్స్ తలలు పట్టుకుని కూర్చున్నారు "ఎవరి పెళ్లి కి వెళ్ళాలో తెలియక "

నిజం ప్రేమ

రాణి : "మన ప్రేమను పెద్దవాళ్ళు ఒప్పుకోకపోతే చచ్చిపోదాం రాజు "

"మా ఆవిడ విధవ కావటం నా కిష్టం లేదు " అనేసి నాలిక కరుచుకున్నాడు రాజు

ఇంటి వంట

"వంట చేస్తున్నావేంటి బావా ? , ఏ హోటల్ లో చూసినా నువ్వు, అక్క కనిపిస్తారుగా రోజూ !"

"మీ అక్క ఊరు వెళ్లిందిరా రాజు " అన్నాడు లక్ష్మీపతి .

అరిచే కుక్క

రాము , కిరణ్ సన్నని సందు గుండా వెళుతున్నారు .
అటువేపునుండి కుక్క ఒకటి గట్టిగా మొరుగుతూ వీళ్ళ వైపు వస్తోంది .

కిరణ్ భయపడి వెనక్కి అడుగేసాడు .

"భయపడతావేంటి, అరిచే కుక్క కరవదు అని తెలీదా ?' అన్నాడు రాము.

"తెలుసు , కాని కుక్క మొరగటం ఆపి ఎప్పుడు కరవటం మొదలు పెడుతుందో తెలీదు కదా !"
అన్నాడు భయం భయం గా కుక్క వంక చూస్తూ కిరణ్