రైతు కష్టాలు

*
ప్రకాశం జిల్లా రైతు సీతయ్య ఇంట్లో మిగిలిన చివరి పత్తిపువ్వు వత్తి
వెలిగించుకోవటానికి చుక్క నూనె లేదు.పుల్లలు లేని అగ్గిపెట్టెతో ఆఖరిపిల్లాడు
రైలాట ఆడుకుంటున్నాడు.అమావాస్య కావటంతో ఇంటికప్పు జల్లెడైనా ,
దీపాల కాంతిని సుడిగాలి మింగేసినట్లు ,నక్షత్రాల మసక వెలుతురుని ,
చీకటి తినేస్తోంది .ఆ పక్కనే ఉన్న కాంట్రాక్టర్ కనకారావు ఇంటి 3 వ అంతస్తు
లో ,చల్లని పాలరాతి ఏసీ గదిలో ఏకైక పుత్ర రత్నం సీలింగ్ కు అలంకరించిన
ఫ్లోరోసెంట్ నక్షత్రాలను చూస్తూ హాయిగా నిద్రలోకి జారుకొంటున్నాడు.

ఇదంతా ఆలోచిస్తున్న సీతయ్యకు మళ్ళీ బాధ కలిగింది .

"నన్ను నా పక్కింటివాడిలా ధనవంతుడిని చెయ్యి"

దేవుని ప్రార్ధించాడు , పొద్దున్న నుండి 1001 వ సారి.

రోజులు ముందుకు వెళుతున్నాయి .సీతయ్య గొంగళి అక్కడే ఉంది .

ఆపకుండా దేవునికి అడుగుతూనే ఉన్నాడు ,

"నేను నీ భక్తుడిని , పక్కింటోడు నీకు ప్రార్ధన కూడా చేయడు.నేను నిన్ను
ఎప్పుడూ తలుస్తూనే ఉంటాను .అయినా వాడికి అన్నీ ఇచ్చావు .నేనేం
తప్పు చేశాను ?"

దేవుడిలా పలికాడు ,

"భక్తా సీతయ్యా ! నువ్వు ఎప్పుడూ నీ కోరికలతో జోరీగ లాగా చెవిలో
నస పెడుతుంటావు .వాడు ఎప్పుడూ ఆ పని చేయలేదు "